Bo Chan Tlak Fa le

Fa Le MiTha Mi Zoh Chun Tlak An si khawh Nak Hnga

Psalms.139:13-14

Ka pum chung thil vial te hi nang mah sermi ansi dih. Ka nu Paw chung I a ka semter tu  nangmah nasi. Hiban tuk thil thuk le khuaruah har mi thil ruang ah hin nangmah cu kan lawmh;keimah kawng I khuaruah har asi mi thil le nangmah nih na tuah mi thil khuaruah har asi mi kawng ah hin kan lawmh. Nangmah  nih na ka hngalh dih cikcek ko.

An Herh Bik Mi

Hngak chia nih a herh bik mi cu Zawn ruah nak, Dawt Nak, Thate zoh khen le Pumcaah a herh mi tuah piak khi asi. Mah hna hi atawi nak in chim ah cun Taksa, Thinlung, Thlarau himnak asi.

Zeiruang ah dah Hngak Chia an rawk?

Hngak chia an rawk nak bik cu Sifak ruang, Nule pa nih hlonh, Nule Pa I then ruang ah le Fimthiam nak cham bau ruang ah asi.

Fale he peh tlai in kan Bible cawn piak ning

 1.Fale hi Pathian Lak sawng an si. Gen.4:1;33:5

2. Pathian pek mi ro … Psalms.127:3-5

3. Pathian pek mi Thluachuah…. Luk. 1:42

4. Pile Pu Caah Luchin…….Phung thlukbia.17:6

Hngakchia I an Man

Hngak Cia ti hi Mirang cun CHILD  a ti I mah bia fang ah hin hngak chia I an man  kan hmuh khawh .

1.       C = Christ. Hngak chia hna hi Jesus khrih sin in a rak mi asi . Nuleva siruang  lawng ah hin fa ngeih khawh asi lo. Nuva fangei lo mi tam pi an um. Cucaah kan fale hna hi Pathian sin in a ra mi an si ruang ah hin an man a fak tuk. Cawk khawh a si lo. Kan fa le hna hi kan mah ta an si lo Pathian ta an si  I  Pathian nih NulePa kha a kan zumh ruang ah a kan hlenh mi lawng an si. Nule Pa nih fale hi Pathian kan theih ter hna lo ah cun  Zumh awk tak lo tiah Pathian nih a kan ti lai. Deuteronomy 6:7-9 ah “Nafa le kha felt e in na cawn piak hna lai I,na inn  chung I na thut ah siseh,lam I na kal ah siseh, na ih ah siseh,na thawh ah siseh,na chimh leng mang hna lai……..Tiah ati.

Kan fale an thin lung chung muru tiang a luh khawh nak ding caah fa le Ih lai ah Tuan bia chimh ding ansi.  Mi cheu nih cun ih lai an fale tuan bian an chimh hna tik ah ngeih nuam sawh sawh Uichur tuan bia, Palo Tuan bia ti hna an chimh hna. Mah hi thil hman lo asi.Israel mi hi Ram kip ah sal an tan tik ah an fa le hi siang inn an kai kho lo I an ca zawng an cawng kho lo. An nu le pa nih zan ih lai ah tuan bia in an miphun kawng, an Pathian nih zei tin dah lam a hruai nak kawng le zumh tak Pathian asi nak kawng kha an chim leng mang hn tik ah mah nih cun an fa le nun ah Pathian an theih nak bik asi. Bia kam thar chung zawng ah  Timothy kha a pi le a nu nih a hngak chiat lio te in Pathian bia in an cawn Piak ruang ah zoh chun awk tak bik Pastor ah ai cang.

2.       H = Holly. Thian hlim  Minung kan thian hlim lio can hi kan hngak chiat lio can asi tiah an rak ti. Ca tial thiam nih cun Vulei ah hin mi phun thum kan um I Nule Pa hi Director asi I Mino le upa pawl hi Actors an si I  Hngak chia hna hi zoh tu an si tiah ati. Hngak chia hi mi nun zoh in ai cawn mi an si tik ah nu le pa nih thian hlim nun kan ngeih hi a rak bia pi tuk. Hngak chia hi zei hmanh tial lo mi Catlap rang he an I lo an ti . Maah ca tlap chung ah cun kut tial dawh the in na tial ah cun duh nung  asi lai I thla lo in na tial ah cun duh nung mi ca tlap ah ai cang kho lai lo. Kan fa le hna hi zei hmanh tial lo mi a thiang hlim mi catlap ban tuk an si.

3.       I = Independence. A luat lat mi an si.  A cheu nu le pa nih fa le an dawt hna an ti I zei tuah hmanh an sian hna lo. Mah ti in a thang mi hngak chia kha a upat tik ah zei tuah hmanh a thiam lo. Cu caah cun kan fa le hi an mah le a tuah khawh tawk  mi rian kha an hngak chiat lio te in tuah ter ding an si. Kawl ram Ral Bawi lak ah  Ram dang mi tiang nih an rak upat mi Maha Bandulah hi zeicaah dah mah ti hin upat awk a tlak tiah an hal tik ah a hngak chiat lio te in a nu le a pa nih Sikan ngei ding in an rak cawn piak ruang ah asi an ti. Nule pa duh nak lawng si lo in fale nih an duh nak kha langh ter nak nawl pek I thil tha le tha lo thei den thiam ding in cawn piak ding hi kan rian asi . A kham in kham lo ding. Hngak chia hi nu le pa ai bo chan peng ding dir hmun ah dir ter lo in a mah te in a dir khawh nak ding caag a hngak chiat lio te in a tuah khawh tawk te kha tuah ter ding asi.

4.       L = Lord.  Hruai tu Bawi. Kan fa le hna hi reng sang le thil ti kho tu si dih hna she ti hi nule pa poh nih kan duh dih. Asi na in kan fa le hi sungh le za tlak an tong leng mang hna. Nule pa le pawng kam mi nih dir khamh peng le tha zang pek peng an hau. Catial thiam tu  U Phe Maung Tin nih cun Saya nak in Siang hngak chia a thiam deuh a hau I nule pa nak in fa le a thiam deh a hau aati. Sungh nak an ton can ah mawh chiat lo in nai zuam than ah cun na awng ko lai tiah tha zang pek an hau, Mah ti kan tuah khawh ah cun Hruai tu tha ah an I cang ko lai. Cun Tinh mi fel an ngeih khawh nak ding zawng ah cawn piak lam hmuh sak an hau.

5.       D = Discipline  Si kan le Dawt nak.  Phung thluk bia. 22:6 ah “A zulh awk a si mi lam kha hngak chia cu cawn piak law a u pat tik ah mah cucu a pial tak ti lai lo”.  Hngak chia caah a tha bik mi siang inn cu inn asi I a tha bik mi le a thiam bik mi Saya ci cu Nu le an si an ti. Moses zawng kha a nu sin ah miphun dawt nak le Pathian theih nak kha a rak cawn hma sa. Cun Timoty zawng In ah a rak cawng. That e in inn ah sikan ngei ding in cawn piak mi fa le cu Minung hmai le Pathian hmai ah mit hmai tha an hmu.

Dongh Nak.

 Nazi hruai tu hiter hi nu le pa nih a hngak chiat lio te in an rak cawn piak lo ruang ah mah ti mi sual ah ai can nak hi asi an ti. A mah I a Pi le a pu hi Pa theih lo mi chung in a rak chuak mi asi. Ca  arak thiam lo tuk I a pa he hin an rak I si peng  Tuan ah a pa nih a thih tak rauang ah nun can dawh lo in a nung I misual bik ah mi nih zoh pa ah ai cang. Cucaah Pathian nih Zoh khenh awk ah a kan hlenh chung mi kan fa le hi tha in kan zoh khenh hna lo ah cun Bia ceih kan si te lai.  Sayamah Tan Myint aung I a tial mi ah, Neh sawh Nak hmun I a thang lian mi cu  tih hrut nun in an nung lan,  Mi kawng ceih nak, hmun I a thang mi cu misual kawl tu, mi thang chiat tu ah ai cang,  Zumh lo nak, lung I hrinh peng nak hmun I a thang mi cu Mitha lo ah ai cang.  Zawn ruah nak um lo nak hmun I a thang mi cu  mizei lo in a nung,  Dawt nak, zawn ruah hmun I a thang mi cu Mizapi cung ah dawt nak a ngei I zawn ruah nak zawng a ngei.

Din fel nak hmun I a thang mi cu Thil dik kha a duh I a tanh peng. Fim thiam nak hmun I a tang mi cu Khua ruat khawh nak nun in a khat, Bia chim ai cum mi chung in a thang mi cu In khawh nak a ngei peng a ti. Kan fa le Mitha Hruai tu tha an si khawh nak ding caah kan inn chung cio in thawk hna uh sih. Amen….