Zei Caah dah Pathian Dawt nak Kan Ci khawh lo

                         Zei Ruang ah Dah Pathian Dawt Nak Kan co Khawh lo

Intro :  Pathian Fapa asi ko nain Kan caah a nun nak pek in tlenh ha ai thim. Zisuh  Nun nak hi a ho hmanh nih lak khawh awk asi lo Amah le in a nun nak a peng ruang ah vai lam tah nak ah a thih kha asi,

Johan 10:17-18 ah, “Kapa nih a ka dawt cu ka nun nak kha pek ka sian caah asi. Cu pek ka sian cu ka nun nak kha ka hmuh than nak hnga caah asi. Ka nun nak cu a ho nih an ka chuh asi lo,kei mah lung tho te in pek ka sian mi asi ko.Pek nak nawl kha ka ngei I lak than nak nawl zong ka ngei. Cucu ka Pa nih tuah seh ti a ka duh mi cu asi.”

Zisuh kan cah ah athih ning le a tuar nak hi a fak bik mi le ning zak bik asi, Rome ral kap pawl nih a hnipuan vial te an phoh dih, hri hrual par ah thir zun an tem mi in an tuk an tuk tik ah thir zum nih zisuh tak sa ah ai bunh I an vun dawh ah khin a tit vun ai la chih dih ti asi.cu lawng silo in vai lam tah tung kha an put ter chih  an chuih an lamh.Vai lam ah an vun thah. Zisuh nih zei sual nak dah a tuah I mah ti hin a tuar hnga? Na ruat bal maw hawi dawt.

Minung tam pi nih zei caah dah vai tam tah ah zisuh athih ti mi hi an thei thiam lo. Zei ruang ah dah vai lam ah thih lo in mah ti hin kan sual nak a kan ngih thiam hnga lo. Kan ngeih thiam hna hei ti  she law a za ko hnga . Pathian nih mah ti in zisuh thih hau lo in kan sual nak a kan ngeih thiam lo nak a ruang cu “Pathian cu a ding mi Bia ceih bawi asi ruang ah” asi. A ding bik mi Kan Pathian nih Mah tihin a rak ti “ A sual mi poh cu a thi ko alai” Ezekiel 18:4b. tiah bia chah nak a rak ngei.

Mivial te nih sual nak kan tuah dih,Cucaah thih nak ing ding mi kan si.Pathian nih a kan dawt I zei hmanh hau lo in kan ngeih thiam hna hei ti she law bochan tlak biak awk tak arak si hnga lo.Pathian thil hman thil dik lawng a tuah . Kan bible chung ah Pathian khuan khan mi le bia chah mi cu a dik tiah ati. Kan Pathian hi a din fel tuk ruang ah kan sual nak hi zei rel lo in a rak um lo.

Kan Pathian nih Zei tin dah a kan khamh I a din fel nak kha a kil kawi hnga? Kan sual nak vial te cu sual ngei lo Zisuh chung ah a chiah ka ai awh ah Zisuh a thi.

Putar Pa khat kha Bia ceih nak zung ah an vun chuah pi.Chang reu tlawm pal te a fir ruang ah asi.Bia ceih bawi nih na sual maw tiah ahal tik ah ka sual  ka rawl atam tuk ruang ah ka fir tiah a leh. Bia ceih bawi pa hi mifel mi tha asi .a thawh I ka zang na fak tuk ko a si nain rawl tam ruang I mithil fir cu kan ngai thiam kho lo. Tang ka na liam lo ah cun Thawng ah na lut lai tiah a ti. Putar Pa nih a lu lei pah in tang ka liam awk ka ngei lo tiah a leh.

Biaceih bawi pa nih cun Bia ceih nak ang khi kha ai phoih I a thut nak thut dan ah a chiah I putar pa sin ah cun a va kal I Bai ceih bawi ka si a phung ning te in dan kan tat lai, cun hawi kawm ah kan ruah ruang ah na liam ding mi cu kei mah nih kan liam piak lai tiah a ti I a zal chung in tang ka a chuah I putar pa caah a liam piak.

Phung bia buar ruang ah cawi le liam a tawng I a cawi liam kho lo mi he kan I lo. A Thiang hlim mi Pathian nawl bia kan buar.cu ruang ah dan tat nak kan tuar a hau. Bia ceih bawi ban tuk in a bawi lu chinh Phoh in mi sual khamh ding ah Zisuh a ra I vai lam tah ah athi. Kan Bible lak ah a sung lawi bik  le a thlum bik tiah ka ruah mi cu van cung khua le bawi si nak vial te kal tak in vu lei ah a rak tum I kalvary vai lam tah nak ah mi sual mi kan caah Zisuh a thi ti mi hi asi.Zisuh nih kan sual lei ba vial te a kan cham piak ti kha kan thin lung tak in kan zumh I kan bawi asi tiah kan co hlan asi ah cunPathian nih kan sual nak vial te kha a kan ngeih thiam. Kan caah zisuh nih  a thlet mi thi sen ruang ah nan sual ti lo tiah a kan ti. Pathian dawt nak hi lung hrin in kan um awk asi lo.  A kan dawt tuk ruang ah a a fa pa ngeih chun a vun thlah I a kan dawt nak kha a langh ter.

Rome 5:8.Asinain Pathian nih cun zei tluk in dah a kan dawt kha hi ti hin a tanghter.Kan nih cu misual kan si rih lio ah hin khrih cu kan caah a thi tiah ati.

Zei Ruang ah Dah Pathian Dawt nak kan co Khawh lo?

Pathian nih a kan dawt tuk ko hei si kaw Zei ruang ah hme a dawt nak kan tin co khawh lo? Pathian dawt nak kan tin co khawh lo nak a ruang cu a sin in kan zam( Kan I Then) ruang ah asi. Pathian dawt nak kan theih lawng si lo in kan tin co khawh nak ding caah  “Hrin Thar”  “Pian Thar “ Kan hau.Zisuh nih “ A ho hmanh hrin than asi lo ah cun Pathian pen nak kha a hmu lai lo ati. Johan 3:3.

Hrin Than Kan ti mi cu Zei dh asi?

Thla rau lei in hrin thar I Pathian inn chung kar ah I ser khi asi. Kan tak pun in hrin than khawh sihmanh hlah uh sih law Thla rau lei in hrin than khawh asi.Kan hrin than khawh nak ding caah kan sual kan I ngai chih I zisuh kha khamh tu le bawi ah kan co hlan a hau.

Sual Ngei chih Cu zei dah asi?

Sual ngeih Chih kan ti mi cu Kan sual ruang ah ngeih chiat khi asi lo. Cun Kan sual ruang ah mit thli tak tah khi asi lo. Sual ngeih chih kan ti mi cu “ KIR THAN’ ti khi asi. A ruang cu kan zulh mi lam a hman lo ti kan theih I cu lam cun kir than  I lam hman zulh khi asi. Kawl Dictionary ah cun Ruah nak hlun vial te kha hlawnh  kal tak  I ruah nak thar in nun tiah a hrilh fiah. Sual nak hmun in kan kir than nak ding a ruang cu kan zulh mi lam a dik lo ruang ah asi. Isaiah nih “ Kan nih cu kan dih lak in a tlau mi tuu ban tuk kan si, kan duh nak cio poh ah kan rak kal. Tiah a ti. ISai.53:6.

Micheu nih cun kan sual nak ruang ah kan ngeih a chia kan tap ko na in kan tuah tawm mi thil tha lo kha kan tuah than theu.Cu cu kan Bible nih sual ngeih chih a ti mi cu asilo. Sual ngeih chih kan ti mi cu kan tuah ser ning thlen khi asi.kan tuah ser ning le kan ruah ning ai thlen lo ah cun Pathian co hlan mi sual ngeih chih asi lai lo.

Pathian Dawt nak Kan tin co khawh lo nak cu cu Zisuh chung ah um lo in biak nak chung ah kan um I kan sual nak kan I ngai chih lo ruang ah asi. Psalm Ca tial tu pa nih Cun “ Bawipa Dawt nak A thawt zia kha tep cio uh a ti ban tuk in a tep mi le a dawt nak a thlum zia a ting co mi kan si khawh nak hnga Bawi pa lei panh in kir Than hna uh sih. Amen.